Ingrid vertellt

Köhlschapp-Computer

Na endlich hebbt de Computerlüüd utklamüstert, wat jeedeen Huusfro glücklich moken ward: Een Köhlschapp wat mitdenken deiht! Een dröff blots nich vergeten un jümmer inprogrammeeren, wat'n rinstellt un wat'n rutnimmt, denn mookt dat Köhlschapp de Inkoopslist fardig un rückt op Knoppdruck een Rezept rut. Ook vun ünnerwegens kannst dat Köhlschapp per Internet anropen un frogen, wat noch fehlen deiht.

Denn kannst gau noch inköpen, no Huus föhren un dien Menü vun't Köhlschapp tohoopstellen loten. Blots koken muttst noch alleen. "Dat weer doch wat för mi", meen een Kollegin, "mien Mann is jümmers an'n Computer togangen. Wenn he nu een Köhlschapp-Computer harr, denn wöör he ja viellicht dat Inköpen un Koken freewillig öbernehmen."

"Wo dröömst du denn nachts vun?" wull een anner ehr op den Teppich trüchhalen. "He röppt di eher vun ünnerwegens an un gifft di de Anwiesen vun dat Köhlschapp wieder." - "Bi mi wöör dat Schapp bald trurig warrn", misch sik een Kolleeg in, "dor is meisttieds nich veel binnen." He is noch Eenspänner. "Un mien Mann wöör dat gor nich toloten, wat uns Köhlschapp de Ansogen mookt. Denn wöör he mol wieswarrn, wat he allens heemlich nachts verdrücken deiht. Bit nu meent he, wat ik dat nich marken do." Elke grien: "Ik mark dat al, disse Innovatschon ward sik nich dörsetten, hett to veel Nodelen för Mannslüüd. Un ik nasch ook gern mol...