Ingrid vertellt

Blots keen Riemels!

Körtens kreeg mien Groot 'n Inloden to'n Hochtied. Do stünn in: "Von Hochzeitsspielen und anderen Beiträgen bitten wir abzusehen."

"Na", dach ich erst, "denn ward dat woll'n beten stief un dröög togohn." Man denn füll mi in, wat ik al allens bi so'n Gelegenheiten beleevt harr: vun Gedichten mit 'riemel di oder ik freet di Effekt' öber Spelen, de de Spelers blameeren bit hen no 'Bruut entföhren', wat de hele Fier kaputt mookt. So hett dat Bruutpoor dor woll doch goot an doon, nix to riskeern.

"Man so'n poor Riemels doot doch nich weh", dach ik noch. Un jüst do heff ik antiquarisch een Riemellexikon funnen, wat Hobbydichters helpen sall sik op allens 'n Riem to moken. Un nu kann ik denn doch verstohn, worüm dat Bruutpoor ook keen Gedichten hebben wull: Op "Pfeife" riemelt sik dor "Gekeife". "Steckst du an die Pfeife, hörst du schon bald Gekeife." Wokeen will denn so'n Oort Wohrheit al bi de Hochtiedsfier höörn? Wenn Se nich jüst'n gode Husfro is kunn se ook glieks ehr Fett wegkriegen mit "Täubchen - Stäubchen": "Mein liebes Täubchen putz weg die Stäubchen, denn bist du nicht reinlich, dann ist das nur peinlich." Oder op "Feier" riemelt sik "Geier". "Auf dieser schönen Feier kommen Gäste wie die Geier".

Nee, dat kümmt ook nich so goot, dücht mi. Oder "Steuer" riemelt sik op "teuer": "Freit ihr heut nur wegen Steuer, kommt die Ehe euch noch teuer!" Nee, dat Bruutpoor weer doch klook: keen Bidrag för die Fier - se wullen blots gode Luun un Toversicht! Günnt wi't jem.