Ingrid vertellt

Radfohrers

Radfohrers sünd nich goot ansehn - vunwegen no boben buckeln un doolwarts topedden! Disse Snack hett woll nix mit de echten Radfohrers to doon.

De doot ja wat för de Welt: fohrt ümweltfründlich un doot wat för de egen Gesundheit. Veele vun jem doot, as weern se mit'n Speeltüüch op de Stroten un de Verkehrsregeln weern för jem gor nich dor. Dor vergeet se bi, wo gefährlich dit Speeltüüch is. De Rööd sünd licht un fohrt bannig gau mit jemmer Gangschaltungen. Wenn'n dor to Fall mit kümmt, helpt ook nich jümmers de Helm. Un wat noch leger is: De sünd so gau, wat'n Footgänger man knapp utwieken kann, wenn he so een Rad, wat ja ook noch liesen ankümmt erst süht. Un Footgängers un Radfohrers, de sünd meisttieds dicht tohooppackt op de Wegen. Dat kümmt woll noch ut de Tied, as de Lüüd mit een Rad ohn groot Hölp, blots mit egen Kraft in Gangen bleeven. Is een Ünnerscheed, wat ik mit mien Oma-Rad eben no den Krämer fohr oder wat mien junge Nober dör de halbe Stadt op Arbeit fohrt. Nich verstohn kann ik, wenn de Radfohrers sik nich an de Regeln hollt: Rechtsfahrgebot, Vörfohrt achten, stohn bi rote Ampeln, bi't Afbegen Hand rut - so swor is dat doch nich!