Ingrid vertellt

Tügnissen

Nu hebbt se jem wedder in de Hand, de Tügnissen. De een strohlt as de Sünn, bi den annern gifft dat Arger to Huus.

Un allens blots wegen een poor Tallen op een Blatt Popier. Is ja egens gor nich so verkehrt dacht, wat tweemol in't Johr för Öllern un Schölers to sehn is, wo goot oder wo slecht de sien Arbeit mookt hett. Man is dat to sehn? Mank een 2 un een 2 kann'n ganze Zensur liggen, vun 2+, also meist noch no'n 1 hen, bit 2-, also al meist'n 3. De School hett dat in de Akten, man to sehn is dat nich. Een anner Bispill: Vör meist 50 Johr harr een Jung, den ik kennen do een 5 in Rechtschreibung. Nu heff ik op'n Böhn een ool Diktatheft funnen. He harr meisttieds 6 oder 7 Fehlers un jümmers stünn een rode 5 dor. Hüüt gifft dat för disse "Leistung" noch 'n 4. Wokeen leggt dat fast? Dat sünd Minschen. De denkt sik dat ut un dor mööt sik denn all no richten. Utdacht hebbt sik welk ook nee Tügnissen för de Lütten, in de "Kompetenzen" affroogt un ankrüzt ward, in veer Spalten (kann ganz, ¾, ½, ¼). To'n Bispill: 'schreibt normgerecht'. Wat is de Norm un wokeen leggt de fast? '... kann Silben, Wörter, Texte (nichtzutreffendes streichen) flüssig vorlesen'. Wat is "flüssig"? Un wo weet ik vun, wat dat goot is, wenn mien Lütt Wöör flüssig lesen deiht, oder mutt he al Texten lesen könen? Leve Lüüd, nehmt jo'n Kinner wichtig, nich de Tügnissen. Lehrt jem recht to Leven. Keen Fuulheit, man ook keen Stress in Kinnerstuven! Ook Einstein un de letzt düütsche Kaiser süllt slechte Schölers west sien. Na und?