Ingrid vertellt

Golf, Golf, Hickory

In Knickerbocker un West wüllt de Golfer in Wentorp jemmer Jubiläum fiern.

Dat sall gediegen warrn op dat Grön. Un wat mookt de Froons? De weern dor doch vör 111 Johr noch gor nich bi? Ik weer dor ook nich bi. Man een beten kann ik öber de Historie vun den Golfplatz doch vertellen: Mien Uropa, Ludwig Frahm, de harr de Gornerei an de Stroot, de hüüt noch 'Gärtnerstraße' heet. Un disse Gorner hett den ersten Golfplatz in Wentorp mit anleggt. Dat weer een Tied, do wöör in dat ole Dörp Wentorp allens nee: De Hamburger Kooplüüd harrn de Gegend "entdeckt" un boon nu jemmer Villen as Sommer- un Weekenenn-Domizil. Un ründ üm de Hüüs leten se sik grote Goorns un Parks anleggen. Uropa harr mit sien Lüüd veel to doon. Ja, un denn müss eben ook een Golfplatz her, vunwegen de Geselligkeit. Un nich anners as hüüt wöör to de Tied blangenbi ook öber Geschäften snackt. Dat Ansehn vun de Hamborger Kooplüüd weer ja jümmers goot. Man ook to de Tied geev dat swarte Schoop un Bedregers. Uropa verleet sik op Handslag-Geschäften - eenmol to veel: He harr eenen Park anleggt, stünn mit den Kunnen op den Balkon un se keken op dat Wark. De Mann meen: "Dor achtern kunn egens noch'n Diek hen." Se möken dat af, Uropa hüür Lüüd un Maschinen an un legg'n groten Diek an. Dat weer een düür Wark. Un as dat an't Betohlen güng, wull de Kunn vun nix wat weten, geev ja keenen Verdrag. So güng de Gorneree pleite un verswünn ut Wentorp. Man de Golfplatz, de besteiht. Glückwunsch!