Bürokratieabbau

Ik meen gor nich de grote Weltpolitik, wonehm dat üm Krieg oder Freden geiht – dat versteiht so un so keeneen mehr. Ik meen blots dat, wat besloten ward, wo sik denn all Lüüd an holen mööt. Wenn dor wat seggt ward för den Öffentlichen Deenst, denn ward dat foken ook in de Wertschop mookt. Oder wenn in de Wertschop wat Mode is, denn süllt ook de Beamten no dat Prinzip arbeiden. As Bispill segg ik hier mol dree Slagwöör: Dokumentatschon, Evaluatschon un Bürokratieabbau. Een beten verstoh ik dat ja: Wenn ik een Arbeit vörheff, denn schriev ik dat op. Wenn ik de Arbeit moken do, schriev ik dorto wo dat löppt. Wenn allens fardig is, denn kiek ik mi dat an, öberlegg, wat goot lopen is un wat anners beter kunn un schrief dat denn ook wedder op. Allens kümmt in dicke Ordner un ward fein wegstellt. Viellicht ook noch mit Kollegen diskereert. Dat is Dokomentatschon un Evaluatschon, bruukt eenen Barg Arbeitstied un veel Popier. Man wat ik nich verstoh: Wo passt Bürokratieabbau dorbi? Viellicht sull ik mol’n Anfroog stellen? Denn köönt de Politikers eenen Utschuss billen, de de Froog ünnersöken deiht. Mit Unnerutschuss för de beiden Bereiche un denn köönt se jemmer Vörgohn dokumenteeren un de Ergebnissen ook un achterran köönt se dat Evalueeren. Man dat duurt. Ik reken dit Johr nich mehr mit wat se mi antern doot.