„Kannitverstahn“

Un denn leest ji in een Blatt een Kritik öber jüst dit Book un dor steiht, wat dat heel afsünnerlich good is. In veele kloke Wöör ward vertellt, wat de Dichter allens rinpackt hett in sien Wark.

Tja, un een annermol lest ji een Book an dat ji jo freien köönt, so ganz un gor mitgohn, viellicht ook lachen un mööt denn in een Kritik lesen, wat dat een heel gewöhnlich un slecht schreben Book is. Un ji froogt jo viellicht sogor, wat ji to dösig sünd oder wat de Kritikers man blots överspöönsch sünd!

Een Antwort finnen op de Froog: Wat is gode Literatur is gor nich so eenfach. Een beten helpen will dor dit Johr de „Bevensen-Tagung“ bi. All de Lüüd, de sik för de plattdüütsche Sprook un för plattdüütsche Literatur interesseren doot, köönt von den 18. September, Klock dree, bit no den 20. September gegen Klock een in dat Kurhuus in Bad Bevensen op de „Jahrestagung für Niederdeutsch“ Literatur heuern, lesen oder „Op de Kist“ sülvst schreben Geschichten vörlesen oder ook in de Warksteden an een Hörspill, een Gedicht oder een Geschicht mitwarken un dorbi rutfinnen, wat för „Gesetzen“ dat gifft, de Literatur „goot“ oder „slecht“ moken doot.

Un för dat Wark un de Kritik gellt denn woll liekeveel dat Motto vun de Dagfohrt: „Kannitverstahn – is nich allens Schokolaad, wat bruun is…“