Osterstollen

"De smeckt doch nu erst richtig", meenen se. Un se müssen dat ja weten. To'n Ersten keem Swiegervadder ut dat Erzgebirge, wonehm disse Kokenort je woll to Huus is. To'n Tweeten weer he Bäckermeister un to'n Drüdden hebbt Swiegeröllern, de op Besöök sünd, jümmers recht. So eten wi to Ostern Wiehnachtsstollen.

Worüm ik dat vertell? Ik will all de trösten, de op'n Barg vun Wiehnachtskeks un Schokolood sitten bleven sünd. Un de dor nu egens nix mehr vun sehn möögt, wieldat se dor je al siet September an knabbern doot. Hier heff ik een poor Tipps: Stollen bit Ostern wegleggen. Spekulatius, Spritzkoken, de swart-witten Keks un sowat mit op Arbeit nehmen: "Hier, loot ju dat smecken. Ik geev eenen ut." Ji ward sehn, bit Fierobend is dat wegputzt. Peperkooken in een Blickdoos goot versluten, dat höllt bit in'n Sommer. Bi'n Picknick smeckt de fein. Marzipon, dat hatt ward, kann een rieben un nächst Johr in'n Wiehnachtskoken backen. Un een beten Wiehnachtskeks bringt an jeden Brotpudding een fein Aroma. (Wenn ji keenen Brotpudding kennt, köönt ji bi mi dat Rezept kriegen). Blots nix wegsmieten, noch sünd de Aktien nich bargop gohn. Wo heet dat noch? Leeber 'n Luus in'n Kohl as gor keen Fleesch.