Wat seggt uns dat?

Nich blots de Ton mookt de Musik, ook de Wöör, de'n bruken deiht, köönt den eenen oder annern Bismack hebben. "Das ist prima" is anners as " das ist cool", ook wenn datsülbige meent is: Dat gefallt mi sünnerlich goot. Nu geiht dat nich blots üm de ingelschen oder franzööschen Wöör, nee, mi fallt op, wat jümmers mehr Dummtüüg mit de düütschen Wöör mookt ward: Is "zurückbauen" nich so slimm as "abreißen"? Den Palast der Republik hebbt se ja trüchboot un nich afreten - liekers is he nu weg. Un uns Suldoten "fallt" ook wedder, hett allens nix holpen, wat uns Dichter un Denker öber dit Woort seggt hebbt no den Krieg. Dammi nochmol, se sünd doot, de jungen Kerls!

De neeste Mood is, wenn jichenswo een Huus för öllere Lüüd opmookt ward, denn is dat keen Olenheim mehr, nee, dat is een "Senioren-Residenz"! Ik heff jüst in mien Ferien een Barg "Residenzen" vun ole Fürsten un anner "Landesherren" ankeeken. Dat sünd alltohoop Museen. Sall ik mi loter in so een "Residenz" föhlen as een Museumsstück? Oder sall ik gor resideeren, regeeren. Dat mookt doch Arbeit. Nee, ik wöör mi freien, wenn ik ook op mien ole Doog een Tohuus, een Heim finnen wöör, woneem se mi gern hebbt un betüdelt, een Olen-Tohuus dücht mi goot. Dat resideeren öberloot ik gern de Fürsten ut fröher Tieden.