Aliens

As een Alien - as een, de nich vun disse Eer is, kümmt een sik männichmol vör, wenn dat üm nee Moden geiht, Soken, de nee op'n Markt sünd. Wenn ik jichenswo op Besöök bün, eet un drink ik, wat op den Disch kümmt - heff ik so lehrt. Man wenn ik froogt warr, wat ik denn woll gern för Tee harr: Wiehnachtstee, oder Roibusch-Vanille oder Sahne-Tee oder Tee mit Kirsch- oder jicheneen anner Gesmack un ik segg denn: "Op't leevst harr ik eenen swatten Tee ohn wat dorbi. Oostfresentee oder mienthalben ook een Ceylon-Mischung.", denn kiekt veele mi an, as weer ik gröön un keem vun'n Mars. "Na goot", segg ik denn, "vun mi ut kann dat ook Pepperminttee sien." Aff un an heff ik Glück. Mi muttt doch nich allens smecken, wat sik een utdenken deiht! Denk mol, wat de hüüt allens in't Beer panschen doot! Un wat dat allens för Koffi gifft! Muttst ook noch'n düür Maschin hebben, wat du de "Pads" mit den Koffi, de gor nich mehr no Koffi smeckt, man no Amaretto oder so wat, wat du den ook opgeten kannst. Klor, wat dor keen echten Amaretto binnen is. Nix gegen Irish Coffee oder Pharisäer, man echt mutt de sien! Tja, vun mi kann de Wertschop nich leven, ik bliev bi den olen Filterkaffee, de no Koffi smecken deiht un kööp keen nee Maschin. Bün ik eben Alien - vun'n Maand! Na und?