Von Höhnergloben twüschen Wiehnachten un Neejohr

Nee, dat geiht üm de bösen Geister. De süllt verdreben warrn. Un so as hier ballert ward, kann ik mi nich vörstellen, wat sik de nächsten teihn Johr ook blots e e n vörwitzig Gespenst sehn lett. Un liekers, nächst Johr geiht dat Geballer wedder los! Gifft ja woll een Barg Lüüd, de hebbt Spooß an den Larm!

Gor nich spoßig is een anner Oort vun Höhnergloben. Dat gifft Lüüd, de loot sik üm't Verrecken nich twüschen Wiehnachten un Neejohr de Hoor snieden! Dat bringt Unglück, meent se. Se meent, dor kann een op den Dood krank vun warrn. Wenn dat so weer, denn müssen ja egens all de Putzbüdels in de Tied de Lodens dicht moken. Kann angohn un een kloogt, wenn he würklich mol krank ward no dat Hoorsnieden!

Veele meent ook, wat se in disse Tied keen Wäsche waschen dröfft. Wenn se dat doot, denn starvt in't nächst Johr een. Ik heff een Fro kennt, de hett op disse Wies een Leven lang dacht, wat se Schuld an den Dood vun ehr Mudder weer. Se harr in de slechte Tied nich noog Winneln för ehr'n Söhn hatt un hett waschen müsst.

Disse Schuld hett ehr drückt. So'n Ort vun Höhnergloben is rein gefährlich! Denn ballert man leber de Gespenster weg, de't nich gifft, man passt op un kaamt goot rin no 2009! Dat wünscht Ingrid.