För de Göörn (2)

Se trocken een den annern öber de lütte Wisch. Op'n Mol reep lütt Grit: "Kiek mol, dor ünnern Boom sitt Een un weent." All lepen se nu hen, wonehm uns lütt Jana mit ehr lüchten geele Hoor un ehr snaaksche Kledaasch seet. Se snacken ehr an: "Wokeen büst du?" - "Hest du di verlopen?" - "Köönt wi di helpen?" Jana keek op un snücker: "Ik bün een Steern - de Komet hett mi öber'n Hupen flogen - ik bün dolfullen - ik will wedder no Huus." De kiebige Franz lach: "So'n dösigen Snack! Een Steern, de vun'n Heben fallt! Pah, so wat gifft dat gor nich!" Man dor keem Jana in Fohrt: "Du büst dösig! Hest du noch nienich wat vun Steernsnuppen heurt?" Helena meen: "Harr Franz in de School oppasst, wüss he ook, wat Steernsnuppen sünd. Wat köönt wi doon?" Jana tuck mit de Schullern: "Weet nich." Helena öberlegg: "Wenn ik an Soken komen will, de to hoch hangt, kladder ik op'n Stohl. Wi haalt eenen Stohl." Dat Steernenkind kladder op den Stohl, reck un streck sik, man se keem nich boben an. Do smeet Franz sik in de Bost: "Ik haal 'n Disch, de is wat höger." Se slepen eenen groten Disch rut. Jana kladder rop. Se reck sik un streck sik, man se weer nich groot noog. Trurig sett se sik hen to weenen. De Kinner trocken sliepsteerts af...