Segen un Flöök

Männichmol geiht dat ook to as bi de Schildbörgers: Wat mien Fründin Maike is, de hett dat nu beleevt. Se is Schoolmeestersch in Berlin. De School pass in de Gegend: Een stootsche Klinkerboo wöör för genau 110 Johr boot. Mit helle Klassen un een groote Aula. Blots för een Turnhall hett dat to de Tied nich langt. De keem erst mehr as söbentig Johr loter dorto, wöör achtern op den Schoolhoff boot. As de School 100 Johr old weer, wöör se - sotoseggen as Geburtsdagsgeschenk - ünner Denkmalschutz stellt. Dat hebbt de, de dor arbeiten doot, gor nich recht mitkregen. Erst nu keem de groot Öberraschen: De Turnhall is ganz un gor rott. All wullen se op't leevst afrieten un nee boon. Ook Geld sull dat vun den Senoot geven. Jeedeen weet jo vun de Qualität un vun de Ästhetik vun disse Söbentiger-Johr-Beton-Serien-Hallen. Man de Denkmalschutz weer in'n Weg. Vör teihn Johr wöör dat hele "Ensemble" ünner Schutz stellt! Nu ward de Hall för düür Geld saneert - grötter un moderner ward se dor nich mit, mutt sogor den olen Footbodden beholen. Man dat leckt erstmol nich mehr dör't Dack un dat is ja ook wat!