Dat Wichtigste toeerst!

Ook mit sien smucke Fru un de twee söten Deerns. Man nu is de Natschon ümdreven vun een wichtig Froog un verlangt dor gau een Antwort op: Wat för een Hund treckt mit in?! För de eenen is klor, wat de ut een Tierheim komen mutt. För de annern is de reine Rass dat Wichtigste. Wedder annere meent, op den Charakter kümmt dat an. De Hund mutt kinnerfründlich sien un ook keen Reporters bieten. Un to luud dröff he ook nich sien - keen Konferenzen stören. Man öber eenen Aspekt heff ik noch gor nix leest: So'n Hund leevt ja mehr as teihn Johr. In de Tied kaamt de Deerns ja in een Öller, in dat se ook mol no de Jungs kieken doot. Un dor kunn so'n Hund bannig goot bi helpen. Keen weet, wat se denn noch "First daughters" sünd? Man den Hund gifft dat noch. Un öber so'n Hund kriggt een fein Kontakt. Labrador oder Golden Retriever liggt vörn, ook Froons mit Schäferhund ward ansnackt. Mit eenen Terrier sünd de Chancen al nich so goot. Bi Mops, Pudel oder Pinscher mookt de Mannslüüd eher'n Bogen üm de Froons. Op dissen wichtigen Aspekt mutt doch mol een Obama henwiesen. Ik warr em mol schrieven. Viellicht warr ik denn noch Berater in't Witte Huus.