Ingrid vertellt

Fiern köönt wi all mol

Samstag, 9. Mai 2009 03:34

Dat hett ja ook sien Vördeelen, wenn'n in Berlin leven deiht. Een kann mol eben merrn in de Week obends een Inloden vun de neddersassisch Landesregeeren annehmen un mit den Minister för Weertschop un Kultur un anner wichtige Lüüd fiern, wat dat de "Charta zum Schutz der Minderheiten- und Regionalsprachen" teihn Johr gifft.

Veel Lüüd ut dat Parlament heff ik op dissen "parlamentarischen Abend" nich sehn. De Minister harr denn ook wat anners vör un hett Fro Dr. Schwandner schickt, de nu vertellen müss, wat Neddersassen allens doon hett för dat Plattdüütsche. Vun de Bundesraat för Nedderdüütsch weer Fro Nath ut Oostfreesland anreist, dat Institut för Nedderdüütsche Sprook hett Dr. Möller henschickt. Un sogor de nee Perfesser för Platt (mit halbe Steed) ut Ollnborg weer anreist.

Ludger Abeln hett modereert un nu kunn diskereert warrn, wat de Charta wat bröcht hett oder nich.

Un de Plattsnackers in't Publikum? De weern man bannich wenig. Klor, wokeen kann denn mol eben för eenen Obend no Berlin föhrn? Un sünst? De Fro ut dat Ministerium meen, wat veel doon ward, un de annern vertellen, wat allens doon warrn kunn: Ut de halbe Steed för den Perfesser müss egens een ganze warrn. Dat müss mehr Steeden as de vun Fro Nath geven, betohlte Lüüd, de sik mehr kümmern könnt!

Nich allens geiht mit Ehrenamt as dat Ministerium sik dat so vörstellt! Mutt een dat as Utopia afschrieben, as Dr. Möller meen? Klor is: Bit nu geiht allens man lütt bi lütt, liekers wi de Charta hebbt. Man fiern köönt wi ja all mol . . .