Wat is en moderne Huusfroo?

Ik heff mol rinkeeken, wat ik nich wat finnen kann, wat mi de Arbeit lichter mookt. Man wat sehg ik op de erste Siet: Sofaküssens, Kunstblomen un een Elfe ut Steen to'n Hensetten! "Allens blots goot to'n Stoff wischen", wöör de Vadder seggen.

Op de nächste Siet: Spitzendischdook un Engels för de Wänn. Denn Smuck: Halskeden un Ringen, bi de een sehn kann, wat för'n Stimmung de Fro jüst hett. "Dat is ja praktisch", meen mien Groot, "denn kann de Mann glieks sehn, wat he leber Afstand höllt, dat gifft weniger Striet".

Na ja, ik weet nich. Un denn bi dat Bild vun "praktische" Ophangsels vun Slipsen un Döker, de hier "Butler" heten doot, ward mi seggt: "Zur guten Haushaltsführung gehört, dass die Schränke mindestens zwei Mal pro Jahr genau unter die Lupe genommen werden. Dabei wird das Alte aussortiert, das Aktuelle gelüftet und danach wieder neu einsortiert." Helpen süllt dor de "Butler" bi.

Man wat is dor "modern" an? An de Kleederbögels oder an de Höhnerogenploster, Bütel för Scheuh, Regencape oder een Dekofolie?

Un welk Fro, froog ik mi, geiht noch mit Lockenwicklers ut Plastik, mit de olen Piekers an no Bett, as se mi dat hier vertellen wüllt?

Ne, ik heff in dit Heft nix funnen, wat eenen groten Huusholt för een junge Fro würklich lichter moken kann. Ik glööv, de hebbt in den Titel vun dat Rekloom eenen Bookstoben vergeten. Dat sull doch ganz sikker heten "De modernde Huusfro".