Allens för'n Mors

Dat geiht mit lütte Soken los as an'n Morgen: Oogen opmoken oder leber nich. Den Finger in de Nees, wenn't keddelt oder leber een Daschendook? Und dat höllt mit de groten Soken noch nich op: Warr ik Manager oder will ik mien Roh? Nee, dor hört ook de Soken to, de blots so aflopen doot, ohn wat een dor extra an denken deiht, so as Aten halen, een Fuust moken, wenn een wat fasthöllt un sowat. Ook dor hett de Brägen fix mit to doon. Tjä un bi den eenen oder annern Brägen geiht denn nix mehr. De Pyschologen kennt so'n Oort Lüüd un seggt, de sünd "entscheidungsschwach"! So'n Tüünkrom! De leevt blots in de verkehrte Tied! Dat is nich langen her, do güng een no'n Bäcker un köff sik een Brot. Swatt oder Witt, dat weer't. Hüüt muttst du mank tominnst twintig Sorten utseuken. Tja, un ik stünn güstern in'n groten neen Loden vör Klopopier un wüss nich: Umweltpopier mit oder ohn Engel? Twee oder dree Lagen? Mit Druck op as Geldschiens oder eenfach witt? Momang, fröher geev dat doch ook rosa, nee, hebbt se nich. Man natt Popier mit un ohn Kamille. Ik öberlegg al'n halve Stünn. Und dat is doch allens blots för'n Mors!