Internet

Ik veklor dat blots, wat ji nich denken doot, wat ik jümmers bi mien Nobers tolustern do. Man disse Nobers seten mi so dicht op de Pell, wat ik nich vörbihören kunn. Un bi de twee Kerls geev dat ook noch wat to kieken: Se harrn 'n Laptop in Gang un bekeeken jümmers wedder densülbigen lütten Film. De wies erst een grote Krüzung, denn eenen vun de beiden, de blangen een Ampel Gitarr speel un denn den annern, de merrn op den Mittelstriepen mit een groot Slagtüüg seet. So wiet ik dat mitkregen heff, wullen se nu noch een Szene anbacken, wonehm se beid op weeren un den Film denn jichenswo in't Internet stellen. Op'n mol snapp ik ook vun de dree Froons dat Wort "Internet" op. Man bi de güng dat üm't Geld: Se weeren Schauspeelerinnen un beklogen sik, wat jemmer Agenturen nich noog för jem deen. Se müssen sik ook noch sülvst de Hacken aflopen. "Und denn will die Agentur noch 70 Euro extra haben, wenn sie mich ins Internet stellen!" Dor beten de annern op an: "Das musst Du machen, sonst findet Dich keiner". "Aha", dach ik "ik bün in't Internet, also bün ik!" De dor nich to finnen is, existeert gor nich. Hett Shakespeare dat meent mit: Bün ik oder bün ik nich, dat is de Froog?