Böker nich vergeten!

Stefan Bargstedt hett sien Book eenfach "Platt" nöömt. De Schünemann-Verlag hett dat rutgeven. Ik heff al mol in blädert un meen, dat is smuck mookt Kannst'n Barg öber Platt in lesen, wat du viellicht noch nich weten hest. Man soveel as ik mitkregen heff, is dat ook een heel persönlich Book, in dat de Schriever veel vun Platt in sien egen Fomilie vertellt. Na, ik warr sehn, wo sik dat lesen deiht. Denn nehm ik noch een lütt Daschenbook mit, dat Bolko Bullerdiek frisch bi den Quickborn-Verlag rutgeven hett. " Vör dien egen Döör" heet dat. Un ik heff ook hier al mol rinschuult: He hett lange Vertellen un korte Texten tohoopstellt, to'n Högen un to'n Nodenken un wedder in beste Bolko-Maneer. De wat för lütte Kinner bruukt, sull "Teihn lüttje Gössels" vun Heidrun Schlieker inpacken. Alleen de Biller sünd een Genuss. In't Internet gifft dat op ehr Homepage noch mehr to entdecken. Frisch op'n Markt is ook een Vertellen ut den Nolass vun Dieter Bellmann. "Windsinfonie" is rutkomen bi Plaggenhauer. Ja, un denn nehm ik för de Fohrt een CD mit: " Beate Kiupel vertellt Plattdüütsche Geschichten vun Fruunslüüd ", Quickborn-Verlag. To'n lachen un to'n weenen. Blangenbi: vun mi is dor ook wat op. Goode Reis un veel Spooß wünscht