Ik bün bedeent!

Een Bedeenung mookt dat Leven wat lichter. Dach ik jümmers. Man nu weet ik, wat'n een Bedeenung erst bedeenen mutt, wat se eenen denn bedeenen kann. Hört sik ümständlich an - is dat ook. Un funktschoneeren deiht dat ook nich.

Man nu mol de Reeg no: Fröher harr ik eenen Fernseher, do drück ik op den Knopp un denn keem een Bild. Ik drück'n annern Knopp un harr Programm een, twee oder dree - un loter ook noch dree mehr. Nu heff ik eenen Hupen Fernbedeener op den Disch: eenen för dat Fernsehen, eenen för den digitalen Receiver een för den Satellitenreceiver un een för den DVD-Player. De för dat Radio liggt'n beten an de Siet. Un dor sall een nu nich mit dörn'anner komen: För dat "Erste" mutt ik digital op 15 drücken un analog op 20. De annern Programmen kann ik mi nich marken.

Man körtens kreeg ik nix mehr. Ik dach, mien Apparot weer twei. Man se harrn eenfach de Frequenzen ännert. Nu müss mien Apparot nee instellt warrn. Ik will doch blots Fernsehn kieken un nich Technik studeeren! Een Fründ kreeg dat klor. Man nu is dat "Erste" nich mehr op 15. Ik mutt söken. Kann dor nich mol een wat erfinnen, wat'n dat so as fröher moken kann: Eenen Knopp drücken, Fööt hoch un kieken?