Dat geiht an mi vörbi

De Versandkosten kunnen glatt lütter utfallen, wenn se mi blots de Böker schickt harrn! Wenn dat nu Rekloom för anner Böker west weer, harr ik dat jo verstohn kunnt, man de een Katalog weer vun'n Boomarkt - na goot, viellicht weet de Bökerfritzen, wat mien Regol al wedder to lütt ward. Un denn weer dor een lütt Heft binnen: "Die moderne Hausfrau". Versekern sull ik mi ook - un dat nich to knapp, Brillen sull ik keupen, Kosmetika un Pillen. Jo, dor weer een groten Zedel vun een Versand-Apotheke bi. Ik wöör nodenkern: Kunn dat angohn, wat de Böker swor to verdauen weern oder Koppien möken? Ik fröög mien Groot, wat dat woll sull mit den Hupen Popier. De meen, dat weer "zielgerichtete Werbung". Ik harr doch den Froonromon bestellt. Sowat leest blots öllere Froons. Dorüm de Brillen un de Pillen un de Huusfro mit de billigen Soken. Un de Krimi, jo, de weer eher wat för Mannslüüd un för nich so ole Froons. Dorüm de Boomarkt un de Versekerungen - bi de jungen lohnt dat ja noch! Och du leve Tied, dor liggt se bi mi ja nu heel und dall mit allens verkehrt! Mutt ik de Rekloom nu mit verschenken, wat se an ehr "Ziel" ankümmt?